Þjóðvegur 1 ófær

Þessi frétt minnir á færslu mína hér fyrir nokkrum dögum um bókun bæjarráðs varðandi Hvalnes - og þvottárskrkiður. Í þeirri bókun beindum við þeirri skoðun okkar til vegamálayfirvalda í landinu að eina raunhæfa lausnin á þessum vegarkafla til framtíðar væru göng undir Lónsheiði.

Hægt er sjá mynd af því grjóti sem reglulega fellur á veginn í þessari frétt af vefsíðunni www.horn.is.

http://www.horn.is/n_nanar.php?ID=2954

Þetta sýnir svo ekki verður um villst að það á að skoða göng undir Lónsheiði sem raunverulegan kost til framtíðar sem allra fyrst. Það er öllum landsmönnum mikilvægt að öryggi á þjóðvegi 1 sé eins og best verður á kosið.

Ófært í Þvottárskriðum

Heilbrigðis - og tryggingamálaráðuneytið hraði vinnu sinni

Á fundi sínum í dag hvatti Heilbrigðis - og öldrunarráð Hornafjarðar Heilbrigðis - og tryggingamálaráðuneytið að hraða vinnu sinni í tengslum við endurnýjun á þjónustusamningi við Sveitarfélagið á rekstri Heilbrigðisstofnunar Suðausturlands. Samningurinn um rekstur stofnunarinnar rennur út núna um áramótin. Starfsmenn sveitarfélagsins lögðu á fundi í ráðuneytinu fram kröfur sveitarfélagsins og rökstuðning fyrir þeim. Sá fundur fór fram miðvikudaginn 15. nóvember.

Ekkert hefur heyrst frá ráðuneytinu síðan þá. Það er von okkar í Heilbrigðis - og öldrunarráði að sá langi tími sem liðinn er frá síðasta fundi sé ávísun á vönduð vinnubrögð ráðuneytisfólks. Mikilvægt er að aflétta allri óvissu sem ríkir um rekstur stofnunarinnar sem allra fyrst.

Það er ljóst að sveitarfélagið leggur mikla áherslu á það að halda verkefninu heima í héraði vegna þess að það telur sig geta unnið verkið mun betur en ríkið. Það hafa heimamenn líka sannað. Fækkað hefur í langlegu, þáttur heimahjúkrunar  og heimaþjónustu hefur aukist í takt við stefnu þeirra sem nú ráða ríkjum í Heilbrigðis - og tryggingamálaráðuneytinu. Við höfum stuðlað að því að aldraðir eiga kost á því að búa sem lengst í heimahúsi. Við förum fram á það að tekið sé tillit til þessa árangurs okkar í nýjum samningi.

Heilbrigðis - og öldrunarráð lýsti líka yfir fullum stuðningi við þau samningsmarkmið sem samþykkt voru á fundi ráðsins 14. nóvember síðastliðinn. Ekkert hafi komið fram sem segi að við eigum að breyta þeim á einn eða annan hátt.

Bæjarráð fagnar ákvörðun Skinneyjar - Þinganess

Bæjarráð samþykkti á fundi sínum í kvöld samhljóða bókun sem ég lagði fram um ákvörðun stjórnar Skinneyjar - Þinganess um að koma að byggingu knattspyrnuhúss. Í bókuninni fagnar bæjarráð eindregið þessari ákvörðun og þakkar viðkomandi aðilum fyrir aðkomuna að þessum málum. Ljóst er að um verður að ræða lyftistöng fyrir allt íþróttalíf á Hornafirði. Fyrirmyndin að húsinu er Risinn sem FH ingar reistu nýverið í Kaplakrika og hefur reynst þeim afar vel.

En annars hljóðar bókunin svona:

Bæjarráð Hornafjarðar þakkar og  fagnar því að stjórn Skinneyjar – Þinganess hefur lýst yfir vilja til þess að koma að uppbyggingu mannvirkja sem efla samfélagið enn frekar. Í bréfi frá fyrirtækinu, dags. 15. des. 2006, kemur fram að sú hugmynd hafi kviknað í framhaldi af heimsókn stjórnar USÚ, að Skinney – Þinganes og Sveitarfélagið Hornafjörður tækju höndum saman um að reisa knattspyrnuhús í líkingu við það hús sem byggt var upp í Kaplakrika í Hafnarfirði. Það er sérstakt ánægjuefni þegar einkafyrirtæki og opinberir aðilar taka höndum saman um verkefni líkt og þetta með það að markmiði að bæta og styrkja samfélagið. Ekki þarf að efast um það að hér er komin lausn til framtíðar fyrir allt íþróttalíf á Hornafirði. Knattspyrnumenn fá tækifæri til þess að æfa við bestu hugsanlegu aðstæður allt árið um kring. Aðrar íþróttagreinar munu einnig njóta góðs af þessari framkvæmd þar sem tímum í íþróttahúsinu fyrir aðrar íþróttgreinar mun fjölga með tilkomu knattspyrnuhússins.

 

Skinney-Þinganes styrkir byggingu knattspyrnuhúss

Höfðingleg gjöf til íþróttalífs á Hornafirði

Föstudaginn 15. desember afhenti Gunnar Ásgeirsson, stjórnarformaður Skinneyjar - Þinganess mér bréf þar sem stjórn fyrirtækisins lýsir yfir vilja til þess að koma að byggingu nýs knattspyrnuhúss á Hornafirði. Í tengslum við 60 ára afmæli fyrirtækisins hefur stjórnin velt því fyrir sér hvernig hægt væri að minnast tímamótanna í samfélaginu. Þegar stjórn USÚ heimsótti framkvæmdastjórann fyrir skömmu og leitaði eftir styrk til uppbyggingar íþróttamannvirkja komst fyrst skriður á málið.

Meirihlutinn í bæjarráði hefur rætt það á síðustu vikum að besta lausnin til framtíðar litið í íþróttalífi Hornfirðinga væri sú að byggja knattspyrnuhús svipað Risanum í Kaplakrika. Þannig getum við byggt upp glæsilega aðstöðu fyrir frjálsar íþróttir án þess skerða æfingasvæði knattspyrnumanna og við opnum einnig íþróttahúsið okkar upp á gátt fyrir aðrar íþróttagreinar yfir vetrartímann.

Peningaupphæðin sem Skinney - Þinganes ætlar sér að leggja til framkvæmdanna er svo sannarlega höfðingleg eða 60 milljónir króna. Upphæðin felur í sér að lögð er fram 1 milljón fyrir hvert starfsár fyrirtækisins.

Það er alltaf gaman þegar einkafyrirtæki og opinberir aðilar geta tekið höndum saman um verkefni eins og þetta til þess að bæta og styrkja samfélagið.

Góður borgarafundur í Nýheimum

Í gærkvöldi var haldinn borgarafundur í Nýheimum þar sem bæjarbúar fengu kynningu á fjárhagsáætlun sveitarfélagsins fyrir næsta ár. Bæjarstjóri, Hjalti Þór Vignisson veitti bæjarbúum góða innsýn inn í það hver helstu markmið okkar verða á næsta ári í fjárhagsáætluninni. Gaman var að sjá hversu margir sáu sér fært að mæta á fundinn. Það sýnir vel að fólki er umhugað um framtíð sveitarfélagsins.

Að lokinni kynningu tók Stefán Ólafsson, framkvæmdastjóri fræðslu - og félagssviðs við fundarstjórninni og bæjarráð sat ásamt bæjarstjóra fyrir svörum um öll þau mál sem fundarmenn vildu ræða sérstaklega. Rétt er að geta þess að í bæjarráði sitja; Reynir Arnarson fyrir Framsóknarflokkinn, Björn Ingi Jónsson fyrir Sjálfstæðisflokkinn og svo ég sjálfur fyrir Samfylkinguna.

Líflegar umræður sköpuðust um hin ýmsu mál á fundinum og voru umræðurnar mjög málefnalegar. Greinilegt var þó að fundarmenn höfðu mikinn áhuga á þeim miklu framkvæmdum sem framundan eru á næsta ári er varða uppbyggingu íþróttamannavirkja. Þar er um að ræða nýja sundlaug, aðstöðu fyrir frjálsar íþróttir auk uppbyggingar nýs grasvallar á Sindravöllum. Fundarmenn og bæjarbúar almennt hafa mikinn áhuga á þessum málum og hafa mikinn metnað fyrir hönd sveitarfélagsins.

Á fundinum kom fram að allar líkur eru á því að ekki verði hægt að synda í nýrri sundlaug á Unglingalandsmóti UMFÍ sem haldið verður á Hornafirði um næstu verslunarmannahelgi. Sig á jarðvegspúða hefur reynst okkur erfitt og skv. nýjustu mælingum sígur púðinn enn. Ég held að allir harmi það að ekki verður hægt að vígja mannvirkið á landsmótinu í sumar.

Mér finnst þó aðalatriðið vera það að við erum að byggja glæsilegt sundlaugarmannvirki til framtíðar fyrir íbúa sveitarfélagsins. Ekki má heldur gleyma því að ný sundlaug hækkar þjónustustigið mjög mikið hér í sveitarfélaginu og kemur til með að nýtast ferðaþjónustunni. Mikilvægast er að við horfum til framtíðar og byggjum mannvirki sem við getum verið stolt af og þjónar öllum almenningi í sveitarfélaginu án þess að sliga rekstur þess.

Lóðarmál voru líka mikið til umræðu. Kom fram í máli bæjarráðsmanna að þau mál verða skoðuð sérstaklega á þessu kjörtímabili. Menn eru sammála um að tími sé til kominn að enduskoða lóðaframboð gaumgæfilega. Fram hefur komið að e.t.v. sé skortur á góðum einbýlishúsalóðum. Það er er eitthvað sem verður að skoða.

Auðvitað voru mörg önnur mál rædd á fundinum eins og samgöngumál, þ.e. hringvegur um Hornafjarðarfljót og göng undir Lónsheiði og eflaust hefði verið hægt að halda áfram með fundinn fram á rauða nótt. En Stefán sleit fundi laust fyrir hálf ellefu og fólk gekk glatt út í nóttina.

 

Borgin vs olíufélögin - dómur kveðinn upp í dag

Það verður gaman að sjá hvernig málaferli borgarinnar gegn olíufélögunum fara í dag. Olíufélögin halda því fram að borginni hafi ekki tekist að sýna fram á að borgin hafi farið halloka í samningum sínum við olíufélögin.

Ég held að það sé sé fullljóst að samráð átti sér stað á milli olíufélaganna en málsvörn þeirra virðist byggjast á því að borgin hafi þrátt fyrir það ekki tapað á viðskiptunum.

Þá fer nú spurningin að verða sú hvort það er nokkuð nauðsynlegt að hafa lög gegn samráði fyrirtækja á markaði ef enginn tapar á því. Menn ætla kannski að fara halda því fram að við höfum öll e.t.v. grætt á samráði olíufélaganna.

Dæmt í skaðabótamálum borgarinnar gegn olíufélögunum

4.600 börn búa við fátækt - verkefni fyrir jafnaðarmenn

Fátækt er þjóðfélagsmein. Skv. nýjustu upplýsingum er ljóst að fátækt er stórt vandamál hér á landi. 4.600 börn búa við fátækt á Íslandi.

Stjórnvöld hrósa sér gjarnan á því að hér hafi verið viðvarandi hagvöxtur og góðæri. Greinilegt er að sá uppgangur hefur ekki verið ætlaður öllum. Börn á Íslandi sem búa við fátækt bera því vitni.

Sú hægri stjórn sem hér hefur stjórnað undanfarin þrjú kjörtímabil hefur kerfisbundið aukið ójöfnuðinn í samfélaginu. Það er skýrt verkefni jafnaðarmanna í næstu ríkisstjórn að stýra þjóðfélaginu af braut miskiptingar, ójöfnuðar og gegndarlausrar frjálshyggju. Þessi börn sem um er rætt hafa tapað á ríkisstjórn Framsóknar og Íhaldsins. Það á verða forgangsverkefni Samfylkingarinnar í næstu ríkisstjórn að rétta hag þessara barna og fjölskyldna þeirra. Jafnaðarmenn geta aldrei sætt sig við svona ástand og svona meðferð á fólki sem þarf að sitja á hliðarlínunni á meðan aðrir bruna fram völlinn með vasana fulla af peningum.  

Komið hefur fram að á Íslandi búa hlutfallslega mun fleiri börn við fátækt en á hinum Norðurlöndunum.

Ríkisstjórnin hefur ekkert gert til þess að rétta hag þessa fólks en hún hefur hins vegar hugsað vel um þá sem sitja hvað glaðastir við allsnægtaborðið. Eða hvað varð um hátekjuskattinn?

Bæjarráð ályktar um verslunarmál

Bæjarráð Hornafjarðar samþykkti einróma á fundi sínum í dag eftirfarandi bókun um stöðu verslunarmála í sveitarfélaginu:

Bæjarráð bendir á að núverandi ástand skaðar samfélagið. Íbúum svæðisins er haldið í algerri óvissu um framhaldið og mikilvægt er að þeir aðilar sem bera ábyrgð á þessari atburðarás skýri sjónarmið sín og fyrirætlanir og axli ábyrgð gagnvart samfélaginu sem þeir starfa í.

Núverandi ástand verslunarmála er óviðunandi og það er mjög mikilvægt að óvissu um framtíð þessara mála verði aflétt sem allra fyrst. Allir þeir sem aðkomu eiga að þessum málum verða að gera sér grein fyrir þeirri samfélagslegu ábyrgð sem þeir bera. Þeir sem tapa mest á því ástandi sem nú er uppi eru íbúar sveitarfélagsins.

Glæsilegur framboðslisti Samfylkingarinnar í Suðurkjördæmi

Kjördæmisþing Samfylkingarinnar samþykkti í gær tillögu kjördæmisstjórnar að framboðslista Samfylkingarinnar í Suðurkjördæmi.

Óhætt er að segja að þar sé valinn maður í hverju rúmi. Björgvin G. Sigurðsson, alþingismaður leiðir listann eftir glæsilegan sigur í prófkjöri. Á eftir honum kemur þrautreyndur þingmaður, Lúðvík Bergvinsson. Í 3. sæti situr svo nýr maður, Róbert Marshall sem hlaut góða kosningu í prófkjörinu 4. nóvember.

Þegar Ragnheiður Hergeirsdóttir varð bæjarstjóri í Árborg eftir að Framsókn gafst upp á Íhaldinu gaf hún frá sér 4. sætið á listanum. Í stað hennar kemur öflugur fulltrúi Samfylkingarfólks af Suðurnesjum, Guðný Hrund Karlsdóttir. 5. sætið vermir svo Guðrún Erlingsdóttir, verkalýðsforingi úr Eyjum sem náði frábærum árangri í prófkjörinu.

Samfylkingin er með fjóra þingmenn í kjördæminu og stefnan er að sjálfsögðu sett á það að halda okkar þingmannafjölda og helst að bæta við. Þessi listi er svo sannarlega líklegur til þess.

Framboðslisti Samfylkingarinnar í Suðurkjördæmi samþykktur

Göng undir Lónsheiði

Bæjarráð Sveitarfélagsins Hornafjarðar samþykkti á fundi sínum í dag eftirfarandi bókun sem Björn Ingi Jónsson bæjarfulltrúi Sjálfstæðisflokksins lagði fram:

Bæjarráð Hornafjarðar vill beina þeim tilmælum til samgönguráðherra og samgöngunefndar Alþingis að í stað þess að ætla 200 milljónir króna til lagfæringar á veginum um Hvalnes- og Þvottárskriður, eins og nú er áætlað í Samgönguáætlun, þá verði þeir fjármunir notaðir til að hefja undirbúning á gerð jarðgangna undir Lónsheiði. Þjóðvegur 1 um skriðurnar er stórvarasamur og öllum ljóst að ekki er um framtíðarvegstæði að ræða  með öllu því grjóthruni og skriðuföllum sem þar eru. Einnig er Hvaldalur  þekkt veðravíti. Mikilvægt er að sem fyrst verði unnið að framtíðarlausn á þessum vegkafla.

Í þau skipti sem Íhaldið leggur fram góð og mikilvæg mál með málefnalegum hætti líkt og gert var í dag er sjálfsagt og eðlilegt að styðja við bakið á þeim málum.