Lífleg pólitísk vika og hressandi Herðubreið

Óhætt er að segja að líf og fjör hafi verið í pólitíkinni í síðustu viku. Segja má að fréttir frá Hornafirði um veg yfir fljótin og væntingar okkar til Vatnajökulsþjóðgarð hafið verið í öðrum hverjum fréttatíma Ríkisútvarps og sjónvarps. Það er nú ekki í hverri viku sem okkar ágæta byggðarlag fær svo góða og mikla fjölmiðlaumfjöllun.

Þjóðgarðsmál

Auðvitað eru skiptar skoðanir um ýmislegt varðandi uppbyggingu þjóðgarðsins enda annað óeðlilegt þegar um svo stórt og mikilvægt verkefni er að ræða. Gott er til þess að vita að svo margt fólk, eins og raun ber vitni, ber hag þjóðgarðsins fyrir brjósti.

Menn hafa deilt á okkur vegna umfjöllunar okkar um staðsetningu yfirstjórnar þjóðgarðsins og þótt framganga okkar í þeim málum of einstrengingsleg. Það þykir mér furðuleg afstaða. Allt frá því að hugmyndir um Vatnajökulsþjóðgarð kviknuðu hafa Hornfirðingar sýnt málinu mikinn áhuga og hafa alla tíð lagt mikið af mörkum til þess að Vatnajökulsþjóðgarður yrði að veruleika. Nægir þar að nefna uppbyggingu metnaðarfullrar jöklasýningar sem staðsett er á Höfn. Frá fyrstu tíð hefur sveitarstjórnarfólk hér talað um að höfuðstöðvar þjóðgarðsins risu í sveitarfélaginu. Við höfum litið á þetta verkefni sem einn helsta aflvakann atvinnu - og byggðaþróun svæðisins og þess vegna leggjum við svona mikla áherslu á það að framkvæmdastjórinn eða yfirstjórnin verði staðsett á Hornafirði, í Ríki Vatnajökuls.

Svo hafa aðrir gagnrýnt okkur vegna staðarvalsins fyrir gestastofu þjóðgarðsins sem fyrirhugað er að reisa í sveitarfélaginu, t.a.m. Gunnlaugur B. Ólafsson frá Stafafelli í Lóni. Hann telur að fyrirhuguð gestastofa hefði átt að rísa við Stafafell.

Þessu eru svæðisráðið og bæjarráð Hornafjarðar ósammála. Við teljum að sú staðsetning, sem hefur orðið ofan á, við Stekkanes nokkrum km. fyrir utan Höfn samræmist mjög vel þeirri stefnu sem hefur verið mörkuð fyrir þjóðgarðinn. Ég er ekki sammála því að þessi staðsetning hafi orðið ofan á vegna þess að hún hafi eingöngu verið byggð á forsendum sjónarmiða um atvinnuuppbyggingu á kostnað sjónarmiða um náttúruvernd og útivist. Ég tel ekki að möguleikar til atvinnuuppbyggingar á svæðinu útiloki möguleika til náttúruverndar og útivistar. Þvert á móti tel ég að þessi sjónarmið verði að kallast á og umræðan má ekki, að mínu mati, fara í þann farveg að eitt útiloki annað.

Heimsókn ráðherranna

Miðvikudaginn síðastliðinn komu svo ráðherrar samgöngu - og viðskiptamála í heimsókn til okkar. Um það fjallaði ég í síðustu færslu. Þeir, Kristján L. Möller og Björgvin G. Sigurðsson komu og funduðu með bæjarstjórn og byggingar - og skipulagsnefnd annars vegar og með íbúum á opnum fundi um kvöldið hins vegar. Fólk hafði að sjálfsögðu mestar áhyggjur af tillögu Vegagerðarinnar um fara leið 1 yfir Hornafjarðarfljótin. Ráðherrarnir voru fyrst og fremst hingað komnir til þess að hlýða á sjónarmið okkar varðandi þessi vegamál. Eins og flestir ættu að vita eru bæjarstjórn og Vegagerðin ekki ásátt um það hvaða leið eigi að verða fyrir valinu.

Langur bæjarstjórnarfundur

Á fimmtudaginn var síðan langur bæjarstjórnarfundur þar sem tekist var nokkuð hart á um heilbrigðis - og öldrunarmál. Það er s.s. ekki í fyrsta sinn sem það gerist á þessu kjörtímabili. Einu sinni sem oftar snerust deilurnar um formsatriði en ekki efnisatriði og í rauninni er lítill pólitískur ágreiningur um málið. Einhugur var í bæjarstjórn um málefni Vatnajökulsþjóðgarðs og um vegstæði yfir fljótin.

Á fundinum var mér falið að rita Kristjáni L. Möller, samgönguráðherra og Árna M. Mathiesen, fjármálaráðherra og 1. þingmanni Suðurkjördæmis bréf þess efnis að bæjarfélagið skorar á ríkisvaldið að tryggja fjármagn til þess að hægt verði að fara leið 3 yfir Hornafjarðarfljót.

Hressandi Herðubreið

Að lokinni jafn annasamri og stormasamri viku í pólitíkinni var hressandi að sjá stútfulla Herðubreið detta inn um bréfalúguna. Herðubreið er sannkallað jafnaðamannablað undir ritstjórn Karsl Th. Birgissonar sem ég hvet alla til að kynna sér.

Ég byrjaði á því að lesa um fyrsta dag Guðmundar Steingrímssonar á þingi og skemmti mér konunglega. Best þótti mér svar hans til Guðna Ágústssonar, um að allt væri hey í harðindum, þegar Guðni minnti Guðmund á orð afa hans, Hermanns Jónassonar, um að allt væri betra en íhaldið.

 

 

Athugasemdir

[Sigfús Már (IP-tala skráð) 22.11.2007 kl. 15:38]

Sæll Árni !

Ég er nú reyndar þannig þenkjandi að ég hefði talið að sá staður sem þessi gestastofa ætti að rísa á væri inni í þjóðgarðinum sjálfum, en ekki utan hans óháð því hvar hún yrði reist. Hvernig væri t.d Þjóðgarðuinn í Skaftafelli ef að þjónustmiðstöðin og gestastofa hans væri á Fagurhólsmýri? Einnig finnst mér vanta mikið í umræðuna um garðinn að þeir aðilar sem eru að leggja land undir garðinn stofni með sér samtök sem gæta þeirra hagsmuna og að þeir ættu fulltrúa í allri ákvarðanatöku sem viðvíkur þessu verkefni. Hef heyrt um bændur sem eiga stórt land og það er gasprað mikið um það hversu dásmalegt það er (sem það er) og einhver af verkefnum Vatnajökulsþjóðgarðs  eigi að fara fram þar en ekkrt hefur verið talað við það fólk og þau spurð út í þeirra afstöðu! Svo er líka spurning og Gunnlaugur á Stafafelli hefur margt til síns mál með það, af hverju eiga menn yfir höfuð að vera leggja lönd undir garðinn ef engin ávinningur er fyrir þá af því? Við verðum að láta skynsemina ráða en ekki blessuðu pólitíkina.