Burt með léttvínsfrumvarpið

Léttvínsfrumvarpið svokallaða er mér ekki að skapi. Það skal ég viðurkenna. Ég sé ekki þörfina eða ástæðurnar fyrir því að gefa sölu á bjór og léttvíni frjálsa. Mér finnst Vínbúðir ÁTVR sinna sínu hlutverki ákaflega vel.

Ég hef t.d. áhyggjur af því að ef salan á léttvíni og bjór verður gefin frjáls þá muni þjónustan við landsbyggðina í þessum málum versna. Vöruúrval og opnunartímar eru nefnilega til fyrirmyndar hjá Vínbúðinni eins og er. Ég hef t.a.m. ekki nokkra trú á því að verslunarmenn muni sjá hag sinn í því að bjóða neytendum sínum upp á þennan fjölbreytileika í vöruúrvali. Þeir munu bara  bjóða fólki upp á það sem best selst hverju sinni.

Nú má það vel vera að flutningsmenn léttvínsfrumvarpsins líti svo á að Vínbúðir ÁTVR geti haldið starfi sínu áfram eftir að salan hefur verið gefin frjáls. En sporin hræða í þessum efnum. Það mun ekki líða langur tími þar til frjálhyggjuarmur Sjálfstæðisflokksnins og kaupmenn halda því fram að ríkið eigi ekki taka þátt í þessum rekstri því þá sé ríkið í komið í samkeppni við einkaaðila. Þannig að um leið og frumvarpið verður samþykkt þá munu raddir um að það sé óeðlilegt að ríkið starfi á þessum vettvangi koma fram.

Ég er líka á móti þessu frumvarpi vegna þess að ég trúi því að bætt aðgengi fólks að þessari vöru, sem sannarlega er vímuefn,i eigi eftir að auka neyslu fólks á áfengi. Það er stefna sem ég held að við ættum að varast því nóg er drykkjan fyrir í samfélaginu. Sérstaklega hef ég áhyggjur af unglingum í þessum efnum.

Flutningsmenn frumvarpsins tengja frumvarpið gjarnan frelsi og er tíðrætt um það. En ég fæ það ekki til þess að tengjast því á nokkurn hátt. Menn eru jafn frjálsir hvort sem þeir nálgast vínið og bjórinn í Vínbúð ÁTVR eða í matvöruverslunum.

Mitt mat er það að þingmenn ættu að einbeita sér að mikilvægari málum í samfélaginu og að flutningsmenn þessarar tillögu þurfi að forgangsraða upp á nýtt.

Athugasemdir

[Guðmundur Rúnar (IP-tala skráð) 15.11.2007 kl. 19:43]

Mikið er ég sammála þér frændi. Þetta er eitt heimskulegasta frumvarp sem ég hef séð og er þá langt til jafnað. Þetta fólk er í fullkominni afneitun og ábyrgðarleysi. Mér finnst best sú hugmynd að 23% áfengi sé á einhvern hátt öðruvísi en 21% áfengi.

Það virkar nokkurn veginn eins - trúðu mér.

Kveðja úr Firðinum.

[Árni Rúnar Þorvaldsson , 16.11.2007 kl. 00:19]

Já frændi, menn virðast halda að 21% sé nánast óáfengt á meðan 23% séu stórhættuleg þó mig gruni að það virkar nokkurn veginn eins, líkt og þú bendir á.

bið að heilsa í Fjörðinn.